唔知大家去北歐旅行嘅時候有冇試過當地嘅甜品,譬如丹麥嘅鬆餅球、芬蘭嘅曼米,仲有瑞典嘅窩夫餅同公主蛋糕等等,呢啲甜品喺歐洲享負盛名,相信大家就算冇食過都聽過吓。但唔知大家又有冇聽過一種幾乎失傳嘅瑞典甜品──Kalvdans呢?Kalvdans喺2008年畀意大利慢食協會評選為四款瑞典區瀕臨絕種菜式之一,佢特別在於只係用咗兩種材料焗製而成,分別就係牛初乳同埋水。或者你會好奇,竟然就咁用兩種液態食材焗成?味道唔會好寡咩?又唔會有好重奶膻味㗎咩?食落口係咪好似奶凍咁?唔會,唔係,錯晒!由於牛初乳比起普通牛奶含有更多蛋白質,所以喺焗嘅時候會凝結,形成類似布甸、蛋撻嘅質感,同時佢含有嘅乳糖成份又比牛奶少,所以食落唔會太甜、聞落唔會太膻。蛤?點解呢種牛初乳同我哋認識嘅牛奶差咁遠嘅?唔係都係牛奶嚟㗎咩?究竟係咩嚟㗎?唔洗心急,等小編慢慢解釋畀你聽啦!

 

咩係牛初乳? 同牛奶有啲咩分別?

雌性哺乳類動物喺產後2至3日分泌嘅乳汁叫做「初乳」(Colostrum),往後分泌嘅叫做「常乳」。而牛初乳(Bovine colostrum),就即係母牛喺分娩後72個鐘內分泌嘅乳汁。

雖然佢哋都係牛奶,但形態同成份都好唔同。牛奶嘅顏色偏黃,質感較稀,牛初乳嘅顏色就偏白,較為濃稠,單憑肉眼都可以分辨到。而且一般嚟講,無論係人類定係動物,初乳含有嘅營養成份都會比常乳豐富,等動物BB可以喺啱啱出世嘅時候有最全面嘅保護。亦因為係畀啱啱出世嘅動物BB食,所以牛初乳乳糖同脂肪含量都比普通牛奶少,但營養成份,譬如蛋白質、礦物質、溶菌酶同維他命,都比普通牛奶多好幾倍。除咗蘊含嘅營養唔同,牛初乳亦含有豐富嘅免疫因子同生長因子,而普通牛奶冇,所以兩者嘅功能唔同,後者主要係補充營養素,前者就主要係為身體提供免疫功效。由於牛初乳產量好少,一隻乳牛平均每年只會生產大約三十公斤,非常珍貴,而且牛初乳蘊含嘅營養素對人體有好多好處,所以又有「軟黃金」嘅稱號。